يمه اطمنچ عليه گطعتهن ايديه
وفيتج بعيني چفيني و سنيني يم المشرعة
يا حره ربيتي ضحيتي و انطيتي لحسين اربعه
اطمأني و انا جايبلچ خبر زين
اربعتنه يمه رحنه فدوة لحسين
من تسأليني اعلى روحي و النفس وين
روحي يمه للاخوه وفت الدين
صوغتي من الطف يا يمة ذني الثنبن
خبر گطع اچفوف ايدية و نبلة العين
يمه ولدچ نشامة ما رجعنه بسلامه
اني اوصي بخواني بايماني و انتاني ما واحد يضل
ولخاطر العشرة والعترة و الزهرة نتگطع وصل
واني اخر منية گطعتهن ايديه
احمد الله يمه صدري خلص انفاس
روحي صعدت للسمه وياها حراس
انتي خليتي المنيه عدنه مقياس
گلتي تنذبحون لازم و ارفع الراس
چان راي ارواح أخوتي يوصل احساس
لمنه گالو واليوصله انته عباس
حمولني امانة رفعي راسچ ورانه
شلتي الصبر رايه وكفايه من هايه بيد المصطفى يالجمر ضوة للنخوه و الخوه بعده ما طفه
من خذتني الحميه گطعتهن اديه
ارد أوصيچ بوصية يالأصيلة
يمة وديلي سلامي للعقيلة
انا ادور لصبرها عن مثيله
من سبوها ماكو واحد تشتكيله
هيه تدري بالكفاله مو قليلة
و انا ادري عگبي هيه هم كفيله
يمه لأخر عمرها انا حارس خدرها
انا الي عرفوني وصفوني سموني سبع الگنطرة
يا يمه واسيها طمنيها بلغيها عني المعذره
عني راحت سبيه گطعتهن اديه
من تلگيت السهم و انطيت دمي
تگله من تذبح نظرتي انا أسمي
گتله راح أكتب خلودي و أجلي همي
يا سهم و الدم مدادي و انته قلمي
السهم حير فضوله هذا عزمي
گتله اريد بهذا موتي تفرح امي
شلون اضيع رباها الله يرضى لراضها
هايه اللي بافكاري بصياري والباري إلها جنته
و اشلون ابن حيدر يتعذر ما يگدر و امه تنخته
عالعهد يالأبية گطتعهن ايديه
انا عد ضنچ يا يمه شوفي قدري
حسين گلي من اتركه احني ضهري
عندي منزلته يا يمه بيه يدري
هو خويه وهو امامي و هو ذخري
نحره من انحز يا يمه قبله نحري
صدره من انرض يا يمه قبله صدري
صاح من طاحت ايدي راح اخويه و عضدي
شفت انخطف لونه واعيونه و اجفونه غرگن بالدمع
واگبال شماته اهاته حسراته صارت تنسمع
ردت ادي التحيه گطعتهن ايديه
انتي مو بس أمرأه وحيدر رضاها
چان نساب العرب يعرف اباها
غيرتچ محد عرف سر محتواها
وين اكو مثلچ مرة تضحي بضناها
سيرتچ من يدري بيها الما قراها
ايگول ماتت فاطمة والله حياها
ما تمرني الهزيمة و أمي هايه العظيمة
انتي الورى افعالي وابدالي للتالي بسمچ افتخر
يا نور البگلبي و بدربي من حربي جايبلچ نصر
هذا نصرچ هديه گطعتهن ايديه
انا ضامي ما تركته جمري يخمد
اشلون يم نيران زينب قلبي يبرد
روحي جفت بس ضميري شفته ورد
و النهر من عاينتله بيه ما صد
متت ضامي ما شربته ربي يشهد
انا هسه يمه گاعد يم محمد
گلي اخذ البشارة صار چفك منارة
لمن تلگاني ضماني كناني راعي الأوله
شفت ابتسم قائل يا كافل تستاهل گبة بكربله
هايه ثمرة قضيه گطتعهن ايديه
للشاعر : ايهاب المالكي .
للرادود : باسم الكربلائي .
ليلة ٤ محرم ١٤٣٨ هـ
طبعت بأنامل العبد المذنب علاء
3laa
